Mae Geraint Williams yn Bennaeth a Phrif Weithredwr Coleg Catholig Dewi Sant, Caerdydd. Mae wedi gweithio mewn addysg ôl-16 am nifer o flynyddoedd, gan gael nifer o rolau ar draws y cwricwlwm a gofal bugeiliol.

Mae wedi gweithio mewn lleoliadau uwchradd ac addysg bellach yn ystod ei yrfa. Ar ôl graddio mewn cemeg o Brifysgol Caerdydd, aeth Geraint ymlaen i gwblhau cymhwyster TAR ac, yna, MA mewn Addysg ym Mhrifysgol Metropolitan Caerdydd.

Fel Cadeirydd Cyngor y Gweithlu Addysg, mae Geraint wedi ymrwymo i gefnogi'r gweithlu proffesiynol, a chyfrannu at ymdriniaeth reoleiddiol sy'n glir, cymesur, ac yn canolbwyntio ar gynnal a datblygu hyder y cyhoedd yn y gweithlu addysg.

Caiff arweinyddiaeth Geraint ei lunio gan ymrwymiad cryf i wasanaeth cyhoeddus ac Addysgu Catholig Cymdeithasol, gyda ffocws penodol ar urddas, cynhwysiant, a gwella cyfleoedd bywyd i ddysgwyr o gymunedau dan anfantais.

Cofrestr buddiannau

Mae David Edwards yn Ddirprwy Bennaeth yn Oasis Academy, Daventry Road, Bryste. Yn ystod ei yrfa, mae wedi gweithio mewn lleoliadau cynradd ac uwchradd, ac wedi treulio nifer o flynyddoedd yn addysgu yn Ne Affrica yn y system addysg wladol.

Mae David yn angerddol am sicrhau cydraddoldeb ar gyfer holl aelodau'r gymuned ysgol, waeth bynnag fo'u hil, rhyw, cyfeiriadedd rhywiol, neu gefndir economaidd. Mae'n ganddo diddordeb penodol mewn ymarfer a hysbysir gan drawma i gefnogi pobl ifanc gyda phrofiadau plentyndod anffafriol.

Mae wedi treulio nifer o flynyddoedd yn addysgu yn Ne Affrica yn y system addysg gwladol yn Durban a Cape Town.

Mae gan David Gymhwyster Proffesiynol Cenedlaethol ar gyfer Prifathrawiaeth yng Nghymru, yn Arweinydd Arbenigol Addysg yn Lloegr, ac yn Arweinydd y Dyfodol yr Adran Addysg.

Cofrestr buddiannau

Mae Kelly Edwards wedi gweithio ym maes addysg, ar draws amrywiol sectorau, ers dros chwarter canrif. Buodd yn athrawes Saesneg yn y sector uwchradd, cyn cymhwyso i fod yn gynghorydd gyrfaoedd. Gorffenodd ei MA mewn Addysg a Hyfforddiant Ôl-orfodol ym Mhrifysgol Cymru Casnewydd yn 2011.

Treuliodd naw mlynedd mewn amrywiol swyddogaethau ym maes addysg uwch yn hen Brifysgol Cymru, Casnewydd a Phrifysgol Morgannwg a Phrifysgol De Cymru, fel rheolwr prosiect, arweinydd rhaglenni ac uwch ddarlithydd ym maes dysgu seiliedig ar waith. Wedyn, symudodd i'r sector dysgu oedolion yn y gymuned i fod yn uwch ymchwilydd a swyddog polisi yn Addysg Oedolion Cymru.

Ymunodd Kelly â Ffederasiwn Hyfforddiant Cenedlaethol Cymru i fod yn Bennaeth Ansawdd Dysgu Seiliedig ar Waith yn 2016, gyda chyfrifoldeb strategol dros arwain y gwaith o wella ansawdd ar draws y sector dysgu seiliedig ar waith yng Nghymru. Ar hyn o bryd mae’n Gyfarwyddwr Partneriaethau a Datblygu Strategol gyda Colegau Cymru.

Cofrestr buddiannau

Dechreuodd Theresa Evans-Rickards weithio ym maes addysg trwy waith gwirfoddol yn y trydydd sector gyda’r Geidiau, yna trwy weithio mewn canolfannau ieuenctid cyn dechrau ar ei gyrfa fel athrawes. Bu’n athrawes Astudiaethau Busnes, TGCh a Chyfrifiadura mewn nifer o ysgolion uwchradd yng Nghymru a Lloegr, gan ddod yn bennaeth cyfadran ac yn uwch arweinydd.

Yn 2010, daeth Theresa yn ymgynghorydd TGCh a Chyfrifiadura ar draws Torfaen a Sir Fynwy, yna dwy flynedd yn y Consortiwm Rhanbarthol. Yn 2014, symudodd i’r sector ADY gan ddod yn Ddirprwy Bennaeth Ysgol Arbennig 3-19 oed. Ochr yn ochr â hyn, datblygodd a rheolodd Teresa Wasanaeth Ymarfer Cynhwysol Awdurdod Lleol, gan gefnogi ysgolion prif ffrwd, ac enillodd TAR ychwanegol ac MA mewn Arweinyddiaeth a Rheolaeth Addysg.

Mae Theresa yn Gadeirydd Cymdeithas Dirprwy Benaethiaid Ysgolion Arbennig De Cymru, sy'n rhoi cyfleoedd i ddatblygu cydweithredu ym maes arweinyddiaeth ar draws y sector. Daeth yn arolygydd cymheiriaid ar gyfer y sector ADY yn 2018. O ganlyniad i’w gwaith dros y degawd diwethaf, mae Theresa wedi dod yn lladmerydd ADY a’r athrawon a’r staff cymorth sy’n gweithio yn y sector hwnnw.

Cofrestr buddiannau

 Dechreuodd Anwen ei gyrfa yn athrawes Saesneg ysgol uwchradd ac mae wedi gweithio ar draws addysg bellach ac addysg uwch. Mae hi hefyd wedi dal ystod o rolau awdurdod lleol gyda ffocws cyson ar wella deilliannau ar gyfer plant a phobl ifanc, o grwpiau bregus a heb gynrychiolaeth ddigonol, yn cynnwys y rheiny o dreftadaeth Sipsiwn, Roma a Theithwyr.

Mae Anwen yn bennaeth ysgol rithwir brofiadol, rôl sy’n rhychwantu addysg, gofal cymdeithasol ac iechyd, lle mae wedi arwain mentrau i fynd i’r afael ag anghydraddoldeb addysgol a chryfhau cymorth ar gyfer dysgwyr sydd â phrofiad o fod mewn gofal. Mae ganddi brofiad o arweinyddiaeth mewn cyd-destunau sector cyhoeddus cymhleth, ynghyd â chryfderau mewn cydweithio, mentora a hyfforddi. Mae ei diddordebau penodol mewn arfer sy’n ystyriol o drawma a chefnogi unigolion a thimau i ddatblygu hyder, galluogedd ac ymagweddau cynhwysol at addysg.

Cofrestr buddiannau

Bu Jane yn gweithio fel athrawes, pennaeth ac ymgynghorydd gwella ysgolion yng Nghaerdydd ers dros 30 mlynedd.

Mae Jane wedi treulio ei gyrfa’n gweithio mewn ysgolion dinesig ac mae bob amser wedi cydnabod pwysigrwydd cefnogi lles cymuned gyfan yr ysgol er mwyn sicrhau’r deilliannau gorau i blant. Canolbwyntiodd ei gwaith gyda’r gwasanaeth ymgynghori ar ddatblygu a gweithredu cwricwlwm y Cyfnod Sylfaen, a bu’n lladmerydd cryf erioed dros ddysgu seiliedig ar chwarae a dysgu dilys.

Ers ymddeol, mae Jane wedi bod yn awyddus i fanteisio ar fwy o gyfleoedd i deithio ac mae wedi bod yn gweithio mewn ysgol yn India yn addysgu Saesneg i fyfyrwyr a staff.

Cofrestr buddiannau

Mae Karl Jones wedi gweithio ym myd addysg am bron i ugain mlynedd. Gweithiodd fel darlithydd mewn cyfrifiadureg yng Ngholeg Merthyr Tudful, cyn dod yn Uwch Ddarlithydd yn Ysgol Addysg ym Mhrifysgol Cymru'r Drindod Dewi Sant. Yn fwy diweddar, mae Karl wedi ymgymryd â rôl Uwch Ddarlithydd mewn Technolegau ym Mhrifysgol Metropolitan Caerdydd, yn dysgu cyfrifiadureg, ac yn rheoli agweddau o'u darpariaeth addysg traws genedlaethol.

Mae Karl hefyd wedi gweithio mewn nifer o rolau addysg ehangach gan gynnwys prif arholwr, craffu addysg, ac Arloeswr cwricwlwm Cymru ar gyfer gwyddoniaeth a thechnoleg. Ynghyd â'i rôl gyda CGA, mae'n llywodraethwr ysgol hefyd.

Fe wnaeth Karl gwblhau ei MSc mewn cyfrifiadureg ym Mhrifysgol Hertfordshire, ac mae'n gweithio tuag at ei PhD ar hyn o bryd. Mae ei ddiddordebau ymchwil yn canolbwyntio ar dechnoleg addysg a gwella cyfranogiad.

Cofrestr buddiannau

Dechreuodd Matthew ei yrfa yn weithiwr ieuenctid a hyfforddwr awyr agored cyn cymhwyso i fod yn athro ysgol gynradd yn 2014. Erbyn hyn, mae’n gweithio yng Nghaerdydd ac wedi addysgu ar draws pob sector mewn amrywiaeth o ysgolion ar hyd a lled de Cymru. Cwblhaodd Radd Meistr mewn Ymarfer Addysgol (MEP) yn 2019 ac mae wrthi’n astudio ar gyfer Doethuriaeth mewn Addysg (EdD) ym Mhrifysgol Caerdydd. Mae ei ymchwil yn archwilio’r modd y mae athrawon ysgolion cynradd yn amgyffred ac yn ymgysylltu ag ymchwil fel ffurf o ddysgu proffesiynol.

Ochr yn ochr â’i rôl ystafell ddosbarth, mae Matthew yn gweithio fel Tiwtor Ymarfer i’r Brifysgol Agored, yn cefnogi athrawon dan hyfforddiant a’u mentoriaid ledled Cymru. Mae hefyd yn aelod o Grŵp Ymchwil TAR y Brifysgol Agored, yn cyfrannu at ddatblygu diwylliant ymchwil cynhwysol ac ysbrydoledig. Mae ei ddiddordebau ymchwil yn cynnwys ymarfer myfyriol, ymholi yn yr ystafell ddosbarth, dysgu proffesiynol, diwygio athrawon a galluogedd athrawon.

Cofrestr buddiannau

Kathryn yw Prif Weithredwr Addysg Oedolion Cymru. Mae Kathryn wedi gweithio yn y sector addysg ôl-16 ers dros 20 mlynedd ac mae wedi datblygu llawer o bartneriaethau i helpu ehangu addysg bellach a dysgu oedolion yn y gymuned.

A chanddi gefndir mewn Rheoli Adnoddau Dynol, mae Kathryn yn Aelod Siartredig o’r CIPD ac mae ganddi gymhwyster Rheoli AD ôl-raddedig o Athrofa Addysg Uwch Abertawe. Mae’n aelod o Fforwm Penaethiaid Colegau Cymru ynghyd â’u Pwyllgor Archwilio, ac mae hefyd yn aelod o Gyngor Gweithredu Gwirfoddol Cymru (CGGC). Mae Kathryn yn ymwneud yn weithgar â datblygu mentrau cydraddoldeb hiliol ac mae’n Aelod Bwrdd o Gyngor Hil Cymru.

Mae gan Kathryn ddiddordeb brwd yn y buddion iechyd a lles sy’n gysylltiedig ag addysg oedolion, ac mae’n gweithio’n weithgar gyda’r Rhwydweithiau Rhagnodi Cymdeithasol ar draws pob rhanbarth. Mae’n lladmerydd dysgu gydol oes i bobl o bob oedran, ac mae wedi ymgymryd â rôl llywodraethwr ysgol ar draws addysg gynradd ac uwchradd trwy gydol ei gyrfa.

Cofrestr buddiannau

Mae Nicola Stubbins wedi gweithio mewn gwasanaeth cyhoeddus ers 1995. Dechreuodd ar ei gyrfa mewn gofal cymdeithasol fel Gweithiwr Cymorth Iechyd Meddwl, ac mae ganddi ystod eang o brofiad ar draws gofal cymdeithasol plant ac oedolion, addysg, tai, a digartrefedd. Mae gan Nicola Ddiploma mewn Gwaith Cymdeithasol a Gradd meistr mewn Gofal Cymdeithasol.

Mae Nicola wedi dal swyddi arwain uwch mewn llywodraeth leol am 18 mlynedd ac ar hyn o bryd mae'n Gyfarwyddwr Corfforaethol Gwasanaethau Cymdeithasol ac Addysg ar gyfer Cyngor Sir Ddinbych.

Mae Nicola yn Ysgrifennydd Anrhydeddus Cymdeithas Cyfarwyddwyr Gwasanaethau Cymdeithasol Cymru, ar ôl bod yn Lywydd yn ystod 2020-21. Mae hi hefyd yn Aelod o Fwrdd RYA Cymru Wales.

Cofrestr buddiannau

Gwawr Taylor yw Ysgrifennydd y Brifysgol a Chyfarwyddwr y Gymraeg ar gyfer Prifysgol Aberystwyth. Mae hi’n arwain ar lwyodraethiant y brifysgol, cydymffurfiaeth sefydliadol, yn arbennig o ran rheoli gwybodaeth, iechyd, diogelwch a’r amgylchedd, cydymffurfiaeth fisas myfyrwyr, cydymffurfiaeth y Gymraeg, gan gynnwys yr adran gyfieithu, a’r ddarpariaeth dysgu Cymraeg.

Yn flaenorol roedd Gwawr yn Ysgrifennydd y Cwmni ar gyfer Coleg Merthyr Tudful, a Tydfil Training Consortium, ac mae hi wedi arwain darpariaeth Gymraeg yn y sectorau addysg uwch ac addysg bellach. Roedd hi hefyd yn aelod o Gyngor yr Eisteddfod Genedlaethol ac yn lywodraethwr awdurdod lleol yn Ysgol Gynradd Dyffryn Cledlyn yng Ngheredigion.

Cofrestr buddiannau

Mae David Williams wedi bod yn ymwneud â gwaith ieuenctid ers ei fod yn 17 oed, fel gwirfoddolwr, ac ar hyn o bryd mae’n rheoli Gwasanaeth Ieuenctid Torfaen. Mae’n gyfrifol am  oruchwylio’r tîm arweinyddiaeth sy’n rheoli’r gwasanaeth o ddydd i ddydd, a gosod y cyfeiriad strategol.

Mae David yn aelod o’r grŵp Arweinyddiaeth a Rheoli, is-grŵp Grŵp Datblygu y Gweithlu Gwaith Ieuenctid, sy'n rhan o gorff ehangach sy'n cefnogi gwaith Strategaeth gwaith ieuenctid i Gymru.

Cofrestr buddiannau