Mae Cyngor y Gweithlu Addysg (CGA) wedi croesawu dau aelod newydd i’w Gyngor.

CGA yw rheoleiddiwr proffesiynol, annibynnol y gweithlu addysg yng Nghymru. Mae’n cofrestru ac yn rheoleiddio ymarferwyr addysg ar draws ysgolion, addysg bellach, gwaith ieuenctid, addysg oedolion a dysgu seiliedig ar waith. Mae aelodau ei Gyngor yn cynnwys cynrychiolaeth o bob grŵp cofrestreion ac maent yn gyfrifol am osod cyfeiriad strategol cyffredinol y sefydliad, a’i lywodraethu.

Penodwyd aelodau newydd y Cyngor gan Ysgrifennydd y Cabinet dros Addysg yn dilyn proses recriwtio agored a theg, a byddant yn dechrau ar eu rôl newydd o 2 Medi 2024 ymlaen. Y ddau yw Karl Jones, Uwch-ddarlithydd mewn Technolegau ym Mhrifysgol Metropolitan Caerdydd, a Dave Edwards, sydd ar secondiad ar hyn o bryd yn Ysgol Gwernyfed ym Mhowys.

Mae’r ddau’n ymuno â 12 cyd-aelod sydd, gyda’i gilydd, yn llunio Cyngor CGA. Yn eu harwain mae’r Cadeirydd, Eithne Hughes, a chânt eu cefnogi gan dîm o staff CGA dan arweiniad Prif Weithredwr CGA, Hayden Llewellyn.

Wrth groesawu’r aelodau newydd, dywedodd Eithne, “Hoffwn gynnig croeso cynnes iawn i’r ddau aelod newydd o’r Cyngor.

“Fel Cyngor, rydym ni’n chwarae rôl werthfawr, nid yn unig o ran cynnig cefnogaeth a chyfeiriad, ond craffu a her hefyd, i waith CGA.

“Mae’r wybodaeth a’r profiad y daw Karl a David â nhw i’w rolau yn amhrisiadwy ac edrychaf ymlaen at weithio gyda nhw dros y blynyddoedd nesaf.”

Dechreuodd tymor y Cyngor presennol ym mis Ebrill 2023.

Mae croeso i aelodau’r cyhoedd fynychu cyfarfodydd y Cyngor.

Mae mwy o wybodaeth am rôl y Cyngor, neu sut i gofrestru diddordeb mewn dod i gyfarfod, ar gael ar wefan CGA.

Mae Cyngor y Gweithlu Addysg (CGA) wedi creu cyfres o fideos astudiaethau achos yn dangos sut mae’r Pasbort Dysgu Proffesiynol (PDP) yn helpu sefydliadau yng Nghymru i gefnogi datblygiad proffesiynol eu staff.

Mae’r casgliad o bedwar fideo (sydd ar gael gydag is-deitlau Cymraeg a Saesneg) yn cynnwys cyfraniadau gan amrywiaeth o sefydliadau addysgol, yn arddangos hyblygrwydd y PDP i addasu i ofynion unigryw unrhyw sefydliad.

Mae’r PDP yn e-bortffolio ar-lein, sy’n gwbl ddwyieithog, ac wedi ei ddylunio i wella datblygiad proffesiynol staff trwy eu cynorthwyo i gipio, myfyrio ar, rhannu a chynllunio’u profiadau proffesiynol a’u dysgu.

Mae am ddim i sefydliadau perthnasol yng Nghymru, heb gontractay, ac mae’n cynnig opsiwn hyblyg ar adeg pan mae cyllidebau dan bwysau.

Wrth gyhoeddi’r gyfres o fideos, dywedodd Bethan Holliday-Stacey, Cyfarwyddwr Datblygiad Proffesiynol, Achredu a Pholisi, “Mae’r PDP yn adnodd blaenllaw o’r radd flaenaf sy’n cynnig cyfoeth o gyfleoedd i sefydliadau helpu grymuso’u staff i gymryd perchnogaeth ar eu dysgu a’u datblygiad proffesiynol.

“Ac yntau’n gyfan gwbl ar-lein, mae’n ei gwneud hi’n haws nag erioed i hwyluso cydweithredu ac adborth effeithiol gyda staff. At hynny, mae’n broses syml ar gyfer storio a chael at ddogfennau, a fydd yn dileu’r angen am ffeilio papurau a dogfennau wedi’u e-bostio.

“Os oes gan eich sefydliad ddiddordeb mewn gweithio gyda ni, neu os hoffent arddangosiad, cysylltwch.”

Gall y PDP gael ei deilwra i fodloni anghenion penodol unrhyw sefydliad, gyda’r opsiwn i ddylunio templedi ac adroddiadau pwrpasol. Hefyd, mae’n cynorthwyo staff i ymgysylltu â’u safonau proffesiynol, gan ei wneud yn adnodd amhrisiadwy i bobl sy’n gweithio yng Nghymru.

I ddarganfod mwy am sut gall y PDP fod o fudd i’ch sefydliad chi, ewch i wefan CGA, neu e-bostiwch This email address is being protected from spambots. You need JavaScript enabled to view it..

Mae Cyngor y Gweithlu Addysg (CGA) a’r Academi Genedlaethol ar gyfer Arweinyddiaeth Addysgol (NAEL) yn falch o gyhoeddi bod papur ymchwil a gomisiynwyd ar y cyd, " Arwain Ymarfer Myfyriol – Adolygu’r Dystiolaeth ", wedi cael ei ryddhau.

Mae’r papur, a ysgrifennwyd gan yr Athro Carol Campbell a Maeva Ceau o Ontario Institute for Studies in Education, Prifysgol Toronto, yn cynnig adolygiad manwl sy’n archwilio cysyniad ymarfer myfyriol, ei effeithiau arwyddocaol ar addysg, a’r arferion arwain sy’n ei gefnogi a’i annog. Hefyd, mae’n amlygu polisïau, fframweithiau a chyfleoedd dysgu proffesiynol sy’n meithrin ymarfer myfyriol, gyda ffocws ar system addysg Cymru.

Bwriedir i’r ymchwil helpu i lywio a chynorthwyo cofrestreion CGA i gydymffurfio â’r egwyddorion allweddol o fewn y Cod Ymddygiad ac Ymarfer Proffesiynol sy’n canolbwyntio ar wybodaeth, dealltwriaeth a dysgu proffesiynol.

Wrth roi sylw ar “fframwaith cenedlaethol datblygedig ar gyfer ymarfer myfyriol” Cymru, nododd Campbell a Caeu bwysigrwydd sefydlu a chynnal offer ac adnoddau sy’n cefnogi a sgaffaldio ymarfer myfyriol effeithiol.

Wrth lansio’r papur, meddai Bethan Holliday-Stacey, Cyfarwyddwr Datblygiad Proffesiynol, Achredu a Pholisi CGA, “Mae’r ymchwil hon yn waith darllen hanfodol i bob addysgwr sy’n ymrwymo i ddatblygiad proffesiynol parhaus a mynd ar drywydd rhagoriaeth mewn addysg. Mae’n darparu dadansoddiad manwl o ymarfer myfyriol, gyda thystiolaeth gadarn yn ategu hynny, ac mae’n cynnig strategaethau ac offer ymarferol y gellir eu rhoi ar waith ym mhob lleoliad addysgol.

“Un offeryn o’r fath a nodir yn y papur yw’r Pasbort Dysgu Proffesiynol (PDP). Mae’r PDP, a ariennir gan Lywodraeth Cymru ac a gyflwynir gennym ni yma yn CGA, yn offeryn dwyieithog, hyblyg, sy’n caniatáu i ddefnyddwyr gofnodi’n gyfrinachol a rhannu profiadau dysgu proffesiynol ffurfiol ac anffurfiol.

“Rydym ni’n gwahodd ein holl gofrestreion i lawrlwytho’r papur i ennill dealltwriaeth fanylach o sut y gall ymarfer myfyriol gael ei integreiddio i’w harferion proffesiynol, a thrawsnewid eu hymarfer o ddydd i ddydd.”

Bydd yr Athro Carol Campbell hefyd yn cynnal Dosbarth Meistr CGA a digwyddiad Datgloi Arweinyddiaeth NAEL ar y cyd ym mis Mehefin i dreiddio’n ddyfnach i ganfyddiadau’r papur ac i arwain trafodaeth ar ddysgu proffesiynol a gwelliant addysgol. Gall holl gofrestreion CGA a rhanddeiliaid ehangach addysg gofrestru yn rhad ac am ddim ar gyfer y digwyddiad hwn.

Mae crynodeb gweithredol ar gael i’w ddarllen ochr yn ochr â’r papur ymchwil llawn, ar wefan CGA.

Mae Cyngor y Gweithlu Addysg wedi cyhoeddi bod nifer o newidiadau wedi dod i rym heddiw (10 Mai 2024) ar gyfer pobl sy’n gweithio mewn addysg ar draws Cymru.

Y cyntaf o’r newidiadau hynny yw ychwanegu dau gategori cofrestru newydd at Gofrestr Ymarferwyr Addysg CGA:

• pobl sy’n gweithio fel pennaeth, neu uwch arweinydd (sy’n ymwneud yn uniongyrchol â rheoli addysgu a dysgu), mewn addysg bellach
• ymarferwyr dysgu oedolion yn y gymuned (a gyflogir gan awdurdodau lleol)

Maent yn ymuno â’r 11 categori presennol sy’n gorfod cofrestru CGA ar hyn o bryd cyn y gallant ddechrau gweithio yng Nghymru.

Mae’r ail newid yn cyflwyno cymwysterau gofynnol i’r rhai sy’n gweithio fel athrawon Addysg Bellach (AB) ac ymarferwyr dysgu oedolion. Mae’r rhestr lawn o gymwysterau gofynnol a dderbynnir i’w gweld ar wefan CGA. Os nad oes gan bobl y cymwysterau hyn ar hyn o bryd, mae ganddynt dair blynedd i’w hennill (pum mlynedd os ydynt yn cael eu cyflogi’n rhan-amser).

Mae’r newidiadau’n dilyn ymgynghoriad cyhoeddus, gan Lywodraeth Cymru, rhwng mis Medi a mis Tachwedd 2023, ac maent yn helpu i gau anghysondebau yn y ddeddfwriaeth bresennol. 

Er mwyn gweithio fel ymarferwr addysg yng Nghymru, mae’n rhaid i unigolion sy’n gweithio mewn rolau penodol gofrestru gyda CGA gyntaf.

Meddai Hayden Llewellyn, Prif Weithredwr CGA “Mae cofrestru a chymwysterau gofynnol yn arfer cyffredin mewn proffesiynau a reoleiddir, gan gynnwys meddygaeth, y gyfraith a gwaith cymdeithasol. Mae’n golygu mai dim ond y bobl sy’n cynnal safon uchel o ymddygiad, ac sy’n gymwys, yn wybodus ac yn fedrus, sy’n gallu gweithio mewn rolau penodol.

“Fel rheoleiddiwr proffesiynol, annibynnol y gweithlu addysg yng Nghymru, mae’r newidiadau hyn yn rhoi cylch gwaith ehangach i ni ddiogelu dysgwyr, pobl ifanc, a rhieni/gwarcheidwaid, gan gynnal ffydd a hyder y cyhoedd ar yr un pryd.”

Bydd y rhai sy’n gorfod cofrestru o dan y newidiadau wedi cael eu cofrestru’n awtomatig trwy eu cyflogwr.

Os hoffech ddarganfod rhagor o wybodaeth am gofrestru gyda CGA, ewch i’r wefan.