Gwasanaeth Ieuenctid Castell-nedd Port Talbot yw’r sefydliad diweddaraf i dderbyn y Marc Ansawdd ar gyfer Gwaith Ieuenctid yng Nghymru, gan dderbyn eu gwobr Arian mewn digwyddiad cyflwyno arbennig yr wythnos ddiwethaf.

Mae’r Marc Ansawdd ar gyfer Gwaith Ieuenctid, a weinyddir gan Gyngor y Gweithlu Addysg (CGA), yn wobr genedlaethol sy’n cefnogi ac yn cydnabod safonau sy’n gwella yn narpariaeth, arferion, a pherfformiad sefydliadau sy’n darparu gwasanaethau ieuenctid. Er mwyn derbyn yr achrediad, rhaid i sefydliadau gwaith ieuenctid hunanasesu yn erbyn set o safonau ansawdd a llwyddo mewn asesiad allanol.

Yn eu hasesiad, dangosodd Gwasanaethau Ieuenctid CNPT i aseswyr sut roedd eu gwasanaeth yn cydnabod ac yn hyrwyddo cydraddoldeb ac amrywiaeth, yn cynllunio’u gwasanaethau i ddiwallu anghenion pobl ifanc, a sut roedd yn cynnwys pobl ifanc mewn prosesau gwneud penderfyniadau.

Dywedodd y Cynghorydd Nia Jenkins, Aelod Cabinet Cyngor Castell-nedd Port Talbot dros Addysg, Sgiliau a Hyfforddiant: “Rwyf wrth fy modd fod y Marc Ansawdd ar gyfer Gwaith Ieuenctid yng Nghymru wedi cael ei ddyfarnu i’n Gwasanaeth Ieuenctid.

“Mae’r gydnabyddiaeth fawreddog hon yn brawf o’u hymroddiad yn cefnogi pobl ifanc yn ein cymuned, a hoffwn longyfarch pob un o’r staff yn y gwasanaeth am eu hymdrechion. Mae eu hymrwymiad i ddarparu gweithgareddau a gwasanaethau gwaith ieuenctid o ansawdd uchel heb ei ail, ac rwy’n falch o weld eu gwaith caled a’u cyflawniadau’n cael eu cydnabod fel hyn."

Mae Gwasanaeth Ieuenctid CNPT yn gweithio gyda phobl ifanc 11-25 mlwydd oed ar hyd a lled ardal Castell-nedd Port Talbot. Ei nod yw rhoi profiadau diddorol a heriol i bobl ifanc, yn ogystal â chynnig cymorth a chyngor ar amrywiaeth o faterion, o ofalwyr ifanc, i LHDTC.

Dywedodd asesydd y Marc Ansawdd ar gyfer Gwaith Ieuenctid, Catrin James, “Gwnaeth ansawdd y dystiolaeth yr oedd y tîm wedi’i pharatoi ar gyfer ein hymweliad argraff fawr arnon ni.  

“Roedd ansawdd y ddarpariaeth ar draws yr amrywiaeth eang o glybiau ieuenctid yn gyson – a gafodd ei ddangos yn glir gan y lefelau uchel o bresenoldeb, a’r amrywiaeth o weithgareddau sy’n cael eu cynnig ym mhob clwb. Roedden ni hefyd yn falch o weld ymagwedd tîm gydlynol y gwasanaethau at gynorthwyo pobl ifanc â’u hanghenion cyflogaeth, tai, a lles.

“Diolch i’r tîm cyfan, a llongyfarchiadau ar y wobr hon, sy’n gwbl haeddiannol.”

I gael mwy o wybodaeth, gan gynnwys manylion am ba sefydliadau sy’n dal Marc Ansawdd ar gyfer Gwaith Ieuenctid, a sut gall eich sefydliad wneud cais i gael ei achredu, ewch i wefan CGA.

Mae Cyngor y Gweithlu Addysg (CGA) wedi cyhoeddi ei Gynllun Strategol 2023-26.

Mae'r cynllun yn gosod blaenoriaethau CGA ar gyfer y cyfnod, ac yn adlewyrchu ar ei rôl a'i gylch gwaith statudol, o fewn cyd-destun ehangach y dirwedd addysgiadol yng Nghymru.

Mae hefyd yn atgyfnerthu gweledigaeth CGA i fod yn rheoleiddiwr proffesiynol, annibynnol y gellid ymddiried ynddo, sy'n gweithio ym mudd y cyhoedd i gynnal proffesiynoldeb, a gwella safonau yn y gweithlu addysg.

Wrth lansio'r Cynllun Strategol, dywedodd Prif Weithredwr CGA, Hayden Llewellyn "Mae'r Cynllun Strategol wedi ei greu i roi cyfeiriad cryf i CGA fel sefydliad.

"O fewn y cynllun, ry'n ni'n gosod ein hymrwymiad i effeithiolrwydd a chynaladwyedd, tra'n amlinellu sut fyddwn yn sicrhau bod cydraddoldeb a thegwch yn parhau i fod yn rhan annatod o'n gweithrediadau a'n gweithdrefnau."

Mae fersiwn ddiweddaraf  Cynllun Cydraddoldeb Strategol CGA 2020-24  hefyd wedi ei gyhoeddi, sy'n esbonio sut, trwy ei rôl a'i gylch gwaith, bydd CGA yn ceisio datblygu ei ymdriniaeth o ran hyrwyddo cydraddoldeb ac amrywiaeth dros y blynyddoedd nesaf.

Datblygwyd y cynlluniau mewn ymgynghoriad â chofrestreion, rhanddeiliaid ar draws y sector addysg ehangach, y cyhoedd, ac aelodau Cyngor y CGA a staff.

Gallwch ddarllen y  Cynllun Strategol 2023-26  ar wefan CGA ynghyd â'r gyfres gyfan o ddogfennau corfforaethol.

Mae Cyngor y Gweithlu Addysg, heddiw (1 Ebrill 2023), wedi croesawu chwe aelod newydd wrth iddo dechrau tymor pedair blynedd newydd.

CGA yw’r rheoleiddiwr proffesiynol, annibynnol ar gyfer y gweithlu addysg yng Nghymru, gan gwmpasu athrawon a staff cymorth dysgu mewn ysgolion a lleoliadau addysg bellach, gweithwyr ieuenctid/cymorth ieuenctid cymwysedig, ac ymarferwyr dysgu seiliedig ar waith. Mae aelodau ei Gyngor yn cynnwys cynrychiolwyr o’r holl grwpiau cofrestreion ac maent yn gyfrifol am osod cyfeiriad strategol cyffredinol y sefydliad, ac am ei lywodraethu.

Penodwyd aelodau newydd y Cyngor gan Weinidog y Gymraeg ac Addysg yn dilyn proses recriwtio agored a theg. Bethan Thomas, Geraint Williams, Jane Jenkins, Kathryn Robson, Rosemary Jones OBE, a Theresa Evans-Rickards, yw’r rhain.

Mae’r garfan newydd yn ymuno â chwe aelod a ailbenodwyd a, gyda’i gilydd, nhw fydd yn llunio’r Cyngor newydd. Bydd tîm o staff CGA yn eu cefnogi, dan arweiniad Prif Weithredwr CGA, Hayden Llewellyn.

Meddai Hayden, wrth roi sylw ar y Cyngor newydd, “Hoffwn estyn croeso cynnes i aelodau newydd ein Cyngor a’r rhai sy’n ailymuno â ni am eu hail dymor.

“Mae aelodau ein Cyngor yn chwarae rôl mor werthfawr, nid yn unig wrth ddod â chymorth a chyfeiriad, ond craffu a her hefyd.

“Edrychwn ymlaen at weithio gyda nhw i gyd dros y pedair blynedd nesaf.”

Un o weithredoedd cyntaf y Cyngor newydd fydd ethol Cadeirydd newydd o blith ei aelodau.

Daw’r Cyngor newydd at ei gilydd ar gyfer ei gyfarfod cyntaf ddydd Iau, 20 Ebrill 2023. Gall aelodau’r cyhoedd sy’n dymuno dod i gyfarfod y Cyngor gofrestru eu diddordeb trwy wefan CGA.

I gael mwy o wybodaeth am rôl aelodau’r Cyngor a CGA, ewch i’r wefan.

Mae Plant y Cymoedd wedi cael eu cydnabod yn ffurfiol am eu gwaith ieuenctid o ansawdd da, gan dderbyn y Marc Ansawdd Efydd ar gyfer Gwaith Ieuenctid yng Nghymru.

Mae’r Marc Ansawdd ar gyfer Gwaith Ieuenctid, a weinyddir gan Gyngor y Gweithlu Addysg (CGA), yn wobr genedlaethol sy’n cefnogi ac yn cydnabod gwelliant mewn safonau darparu, ymarfer a pherfformiad gan sefydliadau sy’n cynnig gwasanaethau gwaith ieuenctid. Er mwyn derbyn yr achrediad, mae’n rhaid i sefydliadau gwaith ieuenctid asesu eu hunain yn erbyn cyfres o safonau ansawdd a chael asesiad allanol llwyddiannus.

I gyflawni’r Marc Ansawdd Efydd, roedd yn ofynnol i Blant y Cymoedd ddangos eu bod yn cynnwys y sylfeini ar gyfer gwaith ieuenctid o ansawdd uchel wrth ddarparu eu gwasanaeth. Mae hynny’n cynnwys ymgsylltu â phobl ifanc wrth ffurfio eu gwasanaeth, meddu ar ddealltwriaeth dda o anghenion y bobl ifanc maen nhw’n gweithio gyda nhw, a sicrhau bod polisïau, gweithdrefnau a chanllawiau ar waith i ddarparu gwasanaeth diogel.

Dywedodd Elise Stewart, Prif Weithredwr Plant y Cymoedd, "Mae Plant y Cymoedd yn falch iawn o fod wedi cyflawni’r Marc Ansawdd Efydd ar gyfer Gwaith Ieuenctid yng Nghymru. Mae hyn yn adlewyrchu’r ymrwymiad i ansawdd gwaith ieuenctid yn ein sefydliad, a gwerth gwaith ieuenctid i bobl ifanc a’n cymunedau."

Mae Plant y Cymoedd yn cynnig dewisiadau amgen cymhellol, mynediad agored sydd ar gael am ddim i bobl ifanc, y mae llawer ohonynt yn wynebu pwysau negyddol gan gyfoedion i ddefnyddio llwybrau dianc (fel cyffuriau ac alcohol), ac sydd mewn perygl o gefnu ar yr ysgol.

Dywedodd Prif Weithredwr CGA, Hayden Llewellyn, “Hoffwn longyfarch Plant y Cymoedd ar dderbyn y Marc Ansawdd Efydd ar gyfer Gwaith Ieuenctid.

“Mae darpariaethau, fel y rhai a gynigir gan Blant y Cymoedd, yn cynnig llwybr amgen pwysig i lawer o bobl ifanc yng Nghymru. Rwy’n falch o weld bod eu gwaith caled a’u hymroddiad i gynorthwyo pobl ifanc wedi cael eu cydnabod”.

I gael rhagor o wybodaeth, gan gynnwys manylion pa sefydliadau sy’n dal y Marc Ansawdd ar gyfer Gwaith Ieuenctid a sut gall eich sefydliad wneud cais i gael ei achredu, ymwelwch â gwefan CGA.