Lawrlwytho'r Adroddiad Blynyddol a Chyfrifon ar gyfer y flwyddyn yn diweddu 31 Mawrth 2024  
Lawrlwytho'r Adroddiad Blynyddol a Chyfrifon ar gyfer y flwyddyn yn diweddu 31 Mawrth 2024 - Trosolwg

Gosodir y ddogfen hon gerbron Senedd Cymru gan Archwilydd Cyffredinol Cymru ac Ysgrifennydd y Cabinet dros Addysg, ar y cyd, yn unol ag Atodlen 1 Deddf Addysg (Cymru) 2014.

Adroddiad ar berfformiad

Rhagair gan y Cadeirydd

Mae’n bleser gennyf gyflwyno Adroddiad Blynyddol a Chyfrifon Cyngor y Gweithlu Addysg (CGA) am y tro cyntaf yn ystod fy nghyfnod fel Cadeirydd, ar ôl i mi gael fy ethol ym mis Mai 2023. Mae’r cyhoeddiad hwn yn amlinellu ein cyflawniadau allweddol a’n proffil ariannol ar gyfer blwyddyn weithredol 2023-24.

Mae’n bleser gennyf adrodd bod CGA wedi llwyddo i gyflawni ei holl swyddogaethau statudol o dan Ddeddf Addysg (Cymru) 2014 unwaith eto, gan wneud hynny mewn modd cost-effeithiol. Hoffwn ddiolch i’n holl staff, aelodau’r Cyngor, a phanelwyr am eu gwaith caled a’u hymroddiad wrth ein helpu i gyflawni hyn.

Ni yw’r rheoleiddiwr proffesiynol, annibynnol ar gyfer y gweithlu addysg yng Nghymru, ac rydym yn deall mai ein rôl, uwchlaw popeth, yw diogelu dysgwyr a chynnal ffydd a hyder y cyhoedd yn ein hymarferwyr addysg yng Nghymru. Yn unol â’r cyfrifoldeb sylweddol hwn, mae CGA bellach yn cynnal y gofrestr gyhoeddus fwyaf yng Nghymru a’r gofrestr ehangaf o ymarferwyr addysg yn y byd, sy’n cynnwys dros 90,000 o gofrestreion mewn 11 o gategorïau cofrestru.

Yn ogystal â’n rôl reoleiddiol, mae gennym swyddogaethau cydategol eraill o fewn y ddeddfwriaeth, yn enwedig hyrwyddo gyrfaoedd yn y proffesiynau addysg a rhoi cyngor i’r llywodraeth ac eraill ar faterion perthnasol. Gallwch ddarllen mwy am y gwaith hwn yng nghorff yr adroddiad hwn.

A ninnau’n sefydliad sy’n annibynnol ar y llywodraeth, ariennir ein gwaith craidd trwy’r ffioedd cofrestru blynyddol a delir gan ein cofrestreion yn unig. Mae ffioedd CGA yn parhau i fod ymhlith yr isaf o unrhyw broffesiwn rheoleiddiedig yn y byd ac nid ydynt wedi newid ers i ni gael ein ffurfio yn 2015, sy’n golygu, mewn gwirionedd, eu bod wedi gostwng.

Wrth ymateb i benderfyniad Llywodraeth Cymru i beidio â darparu cymhorthdal tuag at ffioedd cofrestreion ar gyfer 2024-25, penderfynodd Cyngor CGA ddefnyddio ei gronfeydd ariannol wrth gefn i gadw ffioedd yn ddigyfnewid ar gyfer 2024-25. Mae’n rhaid i CGA aros yn sefydlog yn ariannol, ond roeddem yn pryderu am yr effaith y byddai cynyddu’r ffi ar fyr rybudd yn ei chael ar ein cofrestreion.

Drwy gydol y flwyddyn ddiwethaf, rydym wedi parhau i gynnal ein lefelau uchel arferol o ymgysylltu a rhyngweithio â’n cofrestreion, rhanddeiliaid, a’r cyhoedd, yn ffurfiol ac yn anffurfiol. Os hoffech siarad â ni am ein gwaith, cysylltwch â ni, bydd ein tîm yn falch o helpu.
Ar ran CGA, diolchaf i chi am eich diddordeb yn ein gwaith, a’ch cefnogaeth iddo.

Eithne Hughes
Cadeirydd, CGA