Lawrlwytho Canllaw arfer da ar Iechyd meddwl a lles
Cyflwyniad
Fel aelod o’r gweithlu addysg, gall y gwaith rydych chi’n ei wneud roi llawer o foddhad i chi. Gall gael effaith sylweddol arnoch chi a'ch cydweithwyr, yn ogystal â bywydau plant a phobl ifanc a’u rhieni/gwarcheidwaid. Felly, mae’n hanfodol eich bod yn gofalu am eich iechyd meddwl a’ch lles.
Dydy hyn ddim yn rhywbeth y dylech chi ei wneud dim ond os ydych chi’n cael trafferthion, neu’n teimlo’n isel. Mae’n rhywbeth y dylech chi feddwl amdano drwy’r amser a gofalu amdano o ddifri, yn union fel eich iechyd corfforol. Mae hunanofal da yn adlewyrchu arfer proffesiynol da.
Efallai bod rhai o’r ffactorau sy’n effeithio ar eich iechyd meddwl a’ch lles allan o’ch rheolaeth. Mae cyflogwyr ac arweinyddiaeth sefydliad yn hanfodol i fodelu a chefnogi iechyd a lles emosiynol da. Mae’n bwysig creu amgylchedd lle bo iechyd meyddwl ac emosiynol yn flaenoriaeth diwylliannol. Fodd bynnag, gall y dewisiadau rydych chi’n eu gwneud fel unigolyn fod yn allweddol ar gyfer eich lles eich hun, ac mae llawer o ffyrdd y gallwch gymryd camau cadarnhaol i gefnogi’ch hun.
Dylech ymgyfarwyddo gydag unrhyw bolisïau perthnasol yn eich gweithle. Gallai’r rhain gynnwys polisïau iechyd a diogelwch, iechyd meddwl a lles, a thrais yn y cartref. Bwriad y canllaw yma yw ategu polisïau o’r fath. Mae’n trafod rhai o’r blociau adeiladu craidd i gefnogi’ch iechyd meddwl a’ch lles, yn ogystal ag iechyd meddwl a lles eich cydweithwyr. Mae wedi’i greu i’ch annog i ystyried y camau y gallech eu cymryd o ran sut rydych chi’n gweithio a’ch ffordd o fyw, a allai gael effaith gadarnhaol ar eich lles.
Mae hefyd yn darparu dolenni at ystod o declynnau, adnoddau a ffynonellau cymorth defnyddiol, yn ogystal â manylion cyswllt ar gyfer sefydliadau sy’n gallu rhoi cymorth a chyngor arbenigol i chi.
Rydym wedi creu’r canllaw hwn mewn partneriaeth â’n cydweithwyr yn Education Support, sef yr unig elusen yn y Deyrnas Unedig sy’n ymroi i gefnogi iechyd meddwl a lles athrawon a staff addysg [1].
Y Cod
Mae’r Cod Ymddygiad ac Ymarfer Proffesiynol (y Cod), yn amlinellu egwyddorion allweddol ymddygiad ac ymarfer da ar gyfer cofrestreion.
Fel rhan ohonno mae’n cydnabod pwysigrwydd iechyd meddwl a lles cofrestreion ac yn amlinellu y dylai cofrestreion CGA fod yn ystyriol o’u cyfrifoldeb proffesiynol ar gyfer “iechyd, diogelwch a lles cydweithwyr, a nhw eu hunain”.
Mae’r canllawiau hyn wedi’u cynllunio i ychwanegu at y Cod ac yn cynnig cyngor ymarferol a fydd yn eich cynorthwyo i gyflawni eich cyfrifoldebau proffesiynol.
Blociau adeiladu ar gyfer iechyd meddwl a lles da
Mae tystiolaeth yn awgrymu bod ystod eang o gamau ymarferol y gallwch eu cymryd i helpu gwella’ch iechyd meddwl a’ch lles. Rydym wedi ceisio nodi rhai o’r ‘blociau adeiladu’ craidd a all eich helpu i deimlo’n hapusach ac yn iachach. Mae’r rhain wedi’u seilio ar y pum ffordd at les:
- ffordd iach o fyw: bwyta’n dda, cysgu’n dda, a gwneud ymarfer corff yn rheolaidd
- cyfathrebu: siarad gyda (a gwrando ar) bobl eraill
- sylwi: bod yn ystyriol o’r funud honno a’ch teimladau a’ch meddyliau eich hun
- dal ati i ddysgu: mae dysgu yn rhoi hwb i’n hunan-hyder, yn ein cadw’n brysur, ac yn ein helpu i addasu i newid
- treulio amser yn helpu pobl eraill: gwneud yn siŵr fod cydweithwyr yn teimlo bod pobl yn gwrando arnynt ac yn eu gwerthfawrogi
Nid yw’r ddogfen hon wedi’i bwriadu i gynnig yr holl atebion, ond gobeithio y bydd yn eich helpu i feddwl am eich iechyd meddwl a’ch lles a myfyrio ar y dewisiadau cadarnhaol y gallech eu gwneud.
Ffordd iach o fyw
Mae ffordd iach o fyw yn hanfodol i les meddyliol. Dyma rai elfennau sy’n allweddol i ffordd iach o fyw: ymarfer corff, bwyta’n dda, a chael noson dda o gwsg.
Ymarfer corff
Mae ymarfer corff yn wych ar gyfer eich iechyd corfforol ac mae tystiolaeth wedi dangos y gall hefyd wella lles meddyliol, lleihau straen, rhoi hwb i hunan-barch, gwella canolbwyntio, a’ch helpu i gysgu’n well. Gall ymarfer corff fod yn ffordd o gysylltu â ffrindiau, cydweithwyr, a’r byd o’ch cwmpas hefyd.
Does dim rhaid i chi fynd i’r gampfa bob dydd neu redeg marathon o reidrwydd er mwyn elwa ar y buddion hyn. Canolbwyntiwch yn hytrach ar fwynhau symud – yr hyn sy’n teimlo’n dda i chi. Gallai hyn olygu mynd allan am dro unwaith y dydd neu ailafael mewn gweithgaredd yr oeddech yn arfer ei fwynhau ond nad ydych wedi’i wneud yn ddiweddar, fel nofio neu feicio.
Os ydych chi’n mwynhau cystadleuaeth, yna gallech chi ddefnyddio ap i gofnodi nifer y camau, pellter, neu ailadroddiadau – gan gystadlu yn erbyn chi’ch hun ac efallai herio pobl eraill.
Gall cymryd rhan mewn chwaraeon tîm fod yn wych ar gyfer iechyd meddwl hefyd, gan eich helpu i deimlo nad ydych wedi’ch ynysu, tra’n cynhyrchu endorffinau sy’n gwella’r hwyliau hefyd. Does dim angen i chi fod yn wych, dim ond mynd yno a chefnogi’ch cyd-chwaraewyr.
Os oes gennych chi anabledd neu gyflwr iechyd hirdymor, darganfyddwch am fod yn egnïol os oes gennych chi anabledd.
Bwyta’n dda
Gall bwyta diet cytbwys fod yn heriol – yn enwedig ar ôl diwrnod hir yn y gwaith pan nad oes gennych yr egni na’r cymhelliant efallai i goginio pryd o fwyd iach i chi’ch hun. Ond, fel ymarfer corff, caiff eich diet effaith sylweddol ar les corfforol a meddyliol hefyd.
Gall bwyta diet maethlon a chytbwys wella lefelau egni, gwella canolbwyntio, a’ch helpu i gysgu’n well. Gall diet da a chytbwys helpu atal a lleddfu symptomau salwch meddwl hefyd, yn ogystal â’ch helpu i gynnal pwysau iach, gwella’ch iechyd corfforol a lleihau lefelau risg o ran amrywiaeth o afiechydon a chyflyrau fel diabetes, canser, a chlefyd y galon.
Cynghorion ar gyfer bwyta’n dda
- Cynllunio eich prydau bwyd
Neilltuwch amser yn eich wythnos ar gyfer cynllunio prydau bwyd, a cheisiwch sicrhau bod gennych gynhwysion a fydd yn eich galluogi i wneud prydau bwyd iach. - Cadw i yfed dŵr
Gwnewch yn siŵr eich bod yn yfed yn rheolaidd trwy gydol y dydd. Mae’r GIG yn argymell y dylech yfed 6-8 gwydr neu gwpan o hylif bob dydd (gan gynnwys dŵr, llaeth braster is, diodydd heb siwgr, te a choffi). - Bwyta diet cytbwys
Bydd diet sy’n cynnwys amrywiaeth o grwpiau bwyd yn gwella’ch maeth. Mae canllaw Llywodraeth y Deyrnas Unedig, Eatwell Guide yn dangos faint o’r hyn rydym ni’n ei fwyta yn gyffredinol ddylai ddod o bob grŵp bwyd i sicrhau diet iach a chytbwys. - Bwyta’n rheolaidd
Gall hepgor prydau bwyd darfu ar lefelau siwgr y gwaed, gan achosi i chi fod yn agored i amrywiadau yn eich hwyl a chwantu am fwyd. Mae bwyta prydau bwyd bach neu fyrbrydau yn rheolaidd yn helpu cadw egni yn sefydlog. Mae hefyd yn fuddiol os na allwch chi wynebu coginio neu fwyta prydau bwyd mawr. - Mwynhau bwyta gyda phobl eraill
Defnyddiwch amseroedd prydau bwyd fel cyfle i gysylltu â ffrindiau, cydweithwyr, ac anwyliaid. Does dim rhaid gwneud hyn bob dydd, ond mae eistedd i lawr gyda ffrindiau neu deulu, hyd yn oed unwaith yr wythnos, yn gallu helpu rhoi hwb i’ch hwyliau. - Gofynnwch am gymorth os ydych chi’n meddwl efallai bod gennych chi broblem â bwyd
Os ydych chi’n meddwl eich bod yn defnyddio bwyd, neu’n rheoli a chyfyngu bwydydd, fel mecanwaith ymdopi, a bod hyn yn cael effaith negyddol ar eich bywyd, efallai bod gennych chi anhwylder bwyta. Os ydych chi’n pryderu am hyn, siaradwch â’ch meddyg teulu i ofyn am gyngor a chymorth.
Cael noson dda o gwsg
Mae cwsg yn hanfodol i’n lles emosiynol a meddyliol. Mae’r GIG yn argymell bod angen rhwng saith a nawr awr o gwsg bob nos ar oedolion. Bydd cysgu’n dda yn helpu adfywio’ch corff (gan alluogi iddo dyfu cyhyr ac adnewyddu meinwe). Bydd yn helpu eich iechyd meddwl a’ch lles hefyd gan fod diffyg cwsg yn gallu cynyddu lefelau straen a sbarduno pyliau o iselder.
Mae ein cydweithwyr yn Education Support wedi creu canllaw buddiol sy’n esbonio fod mae cwsg yn bwysig, gan amlinellu naw o gamau ymarferol i wella ein patrymau cysgu.
Cymryd egwyl
Gall cymryd egwyl gael effaith gadarnhaol sylweddol ar eich agwedd meddwl a’ch iechyd meddwl. Gall hefyd helpu gwella’ch cof, hybu creadigrwydd, a lleihau lefelau straen. Gallai hyn olygu egwyl iawn amser cinio yn y gwaith sy’n galluogi i chi gael egni o’r newydd.
Cyfathrebu
Mae’n hanfodol siarad am eich teimladau a’ch profiadau gyda phobl rydych chi’n ymddiried ynddyn nhw. Gall siarad am yr hyn sydd ar eich meddwl gyda ffrindiau a theulu, neu gydweithwyr, fod â rôl allweddol mewn cefnogi’ch iechyd meddwl.
Gall rhai ohonom deimlo’n anghyfforddus yn siarad am ein teimladau, yn enwedig pan fyddwn ni’n ddigalon neu’n anesmwyth. Ond dydy rhannu sut rydym ni’n teimlo ddim yn arwydd o wendid, a gall eich helpu i ymdopi â phroblemau.
Ceisiwch gael amser yn eich wythnos i fod gyda’ch teulu a’ch ffrindiau, fel cyfarfod am ginio, mynd am dro gyda’ch gilydd ar y penwythnos, neu fynd i rywle newydd i gael cinio gyda chydweithiwr.
Mae hefyd yn bwysig ceisio bod yno i’ch cydweithwyr. Ceisiwch gael polisi ‘drws agored’ ac annog cydweithwyr sydd efallai eisiau rhannu eu problemau a’u pryderon gyda chi i siarad. Cofiwch hefyd y bydd rhannu eich pryderon a’ch bregusrwydd eich hun yn helpu pobl eraill i fagu’r hyder i wneud hynny.
Peidiwch byth â bod ofn gofyn am gymorth
Mae angen cymorth ar bob un ohonom ni, weithiau. Efallai eich bod yn teimlo’n flinedig neu efallai eich bod yn dechrau teimlo eich bod wedi’ch llethu gan waith? Os felly, mae bob amser yn well gofyn am gymorth cyn gynted ag y bo modd, i sicrhau eich bod yn mynd i’r afael â phroblemau cyn iddynt gael effaith negyddol ar eich iechyd meddwl a’ch lles. Eich cydweithwyr, teulu a ffrindiau yn aml yw’r bobl orau i siarad â nhw yn gyntaf.
Fodd bynnag, yn dibynnu ar natur y problemau rydych chi’n eu profi, efallai bod angen cymorth a chyngor mwy arbenigol arnoch hefyd. Mae tudalennau olaf y canllaw hwn yn rhoi nifer o ddolenni at adnoddau defnyddiol. Maent hefyd yn rhoi manylion cyswllt ar gyfer sefydliadau sy’n gallu eich helpu os ydych yn profi problemau sylweddol, fel straen, gorbryder, iselder, alcoholiaeth neu feddyliau am hunanladdiad.
Cydbwysedd rhwng gwaith a bywyd
Mae gweithio gyda dysgwyr a phobl ifanc yn heriol, yn gallu cynnwys oriau hir, ac mae angen llawer o hyblygrwydd. Felly, mae’n bwysig gosod ffiniau oherwydd gallai gorlethu’ch hun arwain at ludded. Gall fod yn anodd dweud na, ond mae’n hanfodol sicrhau eich bod yn gadael digon o amser ar gyfer ymlacio, hobïau a diddordebau, a ffrindiau a theulu, yn ogystal â gwaith.
Gall diffyg cydbwysedd rhwng gwaith a bywyd gael effaith sylweddol ar eich iechyd, gan arwain at broblemau fel gorludded, gorbryder, a risg uwch o salwch corfforol. Bydd hefyd yn cael effaith negyddol ar eich lles, heb ddigon o amser i wneud ymarfer corff a chymdeithasu, ac yn cyfrannu at gwsg annigonol ac ansawdd bywyd is. Yn y pen draw, ni fydd diffyg cydbwysedd rhwng gwaith a bywyd yn eich helpu chi, na’ch cyflogwr, oherwydd gall arwain at gyfnodau o salwch ac absenoldeb o’r gwaith. Yn ychwanegol, gallai gael effaith negyddol ar eich perthnasoedd a’ch bywyd personol.
Gall fod yn anodd sicrhau cydbwysedd rhwng gwaith a bywyd. Gall fod yn heriol dweud na, yn enwedig os nad ydych chi wedi arfer gwneud hynny. Mae dysgu dweud na yn y ffordd gywir yn rhan hanfodol o fod yn ymarferwr effeithiol a chynnal eich lles eich hun. Bydd gosod ffiniau yn y modd hwn yn eich helpu i warchod eich iechyd meddwl a’ch lles i gadw egni, gan helpu sicrhau y gallwch fod yn effeithiol pan fydd eich angen fwyaf. Heb ffiniau, mae bod yn agored ac ar gael yn gallu arwain yn gyflym at gael eich gorlethu a’ch gorweithio.
Mae hefyd yn bwysig neilltuo amser ar gyfer eich ffrindiau a’ch teulu, gan roi gwybod iddynt pan fyddwch chi’n rhydd i dreulio amser gyda nhw a phryd y bydd angen i chi gael amser i chi’ch hun. Mae ein cydweithwyr yn Education Support wedi creu canllaw buddiol sy’n amlinellu pwysigrwydd gosod ffiniau a sut i gyfleu hyn i gydweithwyr.
Mae Education Support wedi creu canllaw ar gydbwysedd gwaith a bywyd hefyd.
Sylwi
Mae ‘sylwi’ ynglŷn â thalu sylw (ar bwrpas) i’r hyn sy’n digwydd o’ch cwmpas a sut rydych chi’n teimlo. Mae cymryd amser i fyfyrio ar yr hyn sy’n digwydd yn y fan a’r lle mewn ffordd brysur o fyw yn gallu eich helpu i fwynhau bywyd a gwerthfawrogi’r hyn sydd wir yn bwysig i chi.
Gallai enghreifftiau o sylwi gynnwys:
- treulio amser y tu allan, i sylwi ar bethau newydd, fel newid yn y tymhorau, planhigion a bywyd gwyllt
- gwrando ar eich hoff ddarn o gerddoriaeth, meddwl am sut mae’n gwneud i chi deimlo a pha atgofion sydd gennych, efallai
- cymryd amser bob dydd i ysgrifennu tri pheth yn eich bywyd rydych chi’n teimlo’n ddiolchgar amdanynt
Sylwi trwy ymwybyddiaeth ofalgar
Gall myfyrio ac ymwybyddiaeth ofalgar hefyd chwarae rôl i’chhelpu i gymryd sylw. Mae ymlacio’n feddyliol a chanolbwyntio ar y presennol yn gallu bod yn her enfawr pan fyddwch chi’n canolbwyntio ar eich gwaith. Gall hefyd fod yn anodd dod o hyd i amser ar gyfer gweithgareddau fel myfyrio. Ystyriwch wneud pethau bach i ddechrau trwy fyfyrio am ychydig funudau bob dydd, a gweld a yw’n fuddiol i chi. Mae Education Support wedi creu canllaw ar fyfyrio sy’n amlinellu amryw weithgareddau a thechnegau, gan gynnwys ymwybyddiaeth ofalgar, delweddu, a myfyrio wrth symud. Ceisiwch arbrofi â’r rhain, a gweld pa rai sydd fwyaf buddiol i chi.
Dal ati i ddysgu
Mae dysgu’nn rhoi hwb i’n hunan-barch, yn ein hymgysylltu, ac yn ein helpu i addasu i newid. Dangoswyd hefyd ei fod yn helpu atal iselder yn ddiweddarach mewn bywyd.
Does dim rhaid i ddysgu ddigwydd mewn ystafell ddosbarth. Gall fod yn anffurfiol a gall ddigwydd mewn amryw ffyrdd. Mae’n ymwneud ag archwilio syniadau newydd a manteisio ar brofiadau newydd.
Byddwch yn greadigol
Mae tystiolaeth bod cymryd rhan mewn gweithgareddau creadigol fel celf, crefft, neu chwarae offeryn yn gallu helpu gwella’ch iechyd meddwl a’ch lles. Rhowch fwy o amser i ymgymryd â hobi, nebrosiect creadigol. Efallai, ceisiwch barhau i herio’ch hun trwy ymgymryd â hobi newydd. Efallai y gwelwch chi fod pobl eraill yn rhannu’ch angerdd a bod grwpiau y gallech ymuno â nhw, sy’n cynnwys pobl yn ceisio cyflawni nod tebyg, boed hynny’n glwb garddio, band, cerddorfa neu gôr, clwb rhedeg, neu gylch gwau.
Treulio amser yn helpu pobl eraill
Mae gofalu am eraill yn hanfodol i fod yn ymarferwr addysg. Fodd bynnag, mae’n bwysig cymryd amser i helpu cydweithwyr, yn ogystal â’r dysgwyr a’r bobl ifanc rydych chi’n gweithio gyda nhw. Byddwch yn agored a gonest â’ch cydweithwyr ac, uwchlaw popeth, byddwch yn barod i wrando ar eu problemau a’u pryderon.
Mae pawb eisiau teimlo eu bod yn cael eu gwerthfawrogi, ond weithiau mae cyflymdra ein bywydau arno yn golygu bod rhai pobl yn gallu teimlo eu bod yn cael eu hanghofio. Gall gweithredoedd caredig syml gael rôl sylweddol mewn helpu cydweithwyr, a allai fod yn profi problemau, i deimlo eu bod yn cael eu gweld, eu gwerthfawrogi, ac yn derbyn gofal. Nid oes rhaid i weithred garedig fod yn rhywbeth mawr – gall unrhyw beth o ganmol ffrind neu wneud paned o de i rywun roi buddion gwirioneddol i’w lles nhw, a’ch lles chi. Mae’n hysbys fod gweithredoedd o’r fath yn rhoi teimladau o ewfforia i unigolion, ac mae’n cynyddu lefelau serotonin i’r sawl sy’n rhoi ac yn derbyn, fel ei gilydd.
Os ydych chi’n meddwl y gallai cydweithiwr fod yn cael trafferthion, rhowch wybod iddo fod cymorth ar gael. Gofynnwch iddynt beth sydd ei angen, a ph’un a allwch chi fod o gymorth, anogwch iddynt gymryd seibiant, a dangoswch empathi a charedigrwydd. Os ydych chi’n meddwl y gallai fod angen cymorth ychwanegol arnynt, anogwch nhw i ddefnyddio’r gwasanaethau a’r adnoddau sydd wedi’u hamlygu yn y canllaw hwn ac ar wefan Education Support.
Dolenni ac adnoddau defnyddiol
Mae nifer o’r dolenni a’r adnoddau isod yn cynnwys esiamplau o arfer da. Dylech hefyd sicrhau eich bod yn gyfarwydd ag unrhw bolisïau yn y gweithle. Gallai eich undeb llafur (yn genedlaethol a thrwy gynrychiolwyr lleol) hefyd fod yn ffynhonell ddefnyddiol o help a chyngor ar faterion iechyd meddwl a lles.
Education Support
Cenhadaeth Education Support yw gwella iechyd meddwl a lles staff addysg. Maent yn credu bod iechyd meddwl gwell yn arwain at addysg well.
Mae gwefan yr elusen yn cynnwys llawer o wybodaeth a chyngor buddiol i gefnogi eich iechyd meddwl a’ch lles. Maent hefyd yn darparu adnoddau ymarferol sy’n ymdrin ag ystod o destunau, gan gynnwys:
- gorbryder
- straen
- lludded
- bywyd gweithio
- iselder
- galar neu brofedigaeth
- bywyd personol
- hunanofal
- cyllid
Mae Education Support wedi cynhyrchu adnoddau defnyddiol ar gyfer arweinwyr hefyd, gan gynnwys y canllaw hwn i wneud lles yn rhan o fywyd bob dydd ac yn offeryn ar gyfer cynnal archwiliad lles staff.
Yr Awdurdod Gweithredol Iechyd a Diogelwch – Pecyn Cymorth Siarad. Atal straen yn gysylltiedig â gwaith
Dolen: Talking Toolkit: Preventing work-related stress (hse.gov.uk)
Sefydliad Iechyd Meddwl – gwybodaeth am broblemau iechyd meddwl mewn cymunedau Pobl Ddu, Asiaidd a Lleiafrifoedd Ethnig:
Dolen: https://www.mentalhealth.org.uk/explore-mental-health/a-z-topics/black-asian-and-minority-ethnic-bame-communities
Mentally Healthy Schools – adnoddau ar gyfer deall a hyrwyddo iechyd meddwl a lles disgyblion:
Gwefan: https://www.mentallyhealthyschools.org.uk/whole-school-approach/supporting-staff-wellbeing/
Mind - gwybodaeth am iechyd meddwl LHDTC+
https://www.mind.org.uk/information-support/tips-for-everyday-living/lgbtiqplus-mental-health/about-lgbtiqplus-mental-health/
Llywodraeth Cymru – Fframwaith ar sefydlu dull ysgol gyfan ar gyfer llesiant emosiynol a meddyliol:
Dolen: https://llyw.cymru/fframwaith-ar-sefydlu-dull-ysgol-gyfan-ar-gyfer-llesiant-emosiynol-meddyliol
Os oes angen i chi siarad gyda rhywun
Alcoholics anonymous
Gwefan: https://www.alcoholics-anonymous.org.uk/
Llinell gymorth genedlaethol: 0800 917 7650
Anxiety UK:
Gwefan: https://www.anxietyuk.org.uk
Ffôn: 03444 775 774
Bipolar UK:
Gwefan: https://www.bipolaruk.org
Ffôn: 0333 323 3880
Education Support:
Gwefan: https://www.educationsupport.org.uk/
Llinell gymorth: 08000 562 661
Men’s Health Forum:
Gwefan: https://www.menshealthforum.org.uk
Ffôn: 0330 097 0654
No panic:
Gwefan: https://www.nopanic.org.uk
Ffôn: 0300 772 9844
Menopause:
Rock My Menopause
Website: https://www.rockmymenopause.com
The Menopause Charity
Website: https://www.themenopausecharity.org
Mind Cymru:
Gwefan: https://www.mind.org.uk
Ffôn: 0300 123 3393
OCD UK:
Gwefan: https://www.ocduk.org
Ffôn: 03332 588112
Rethink Mental Illness:
Gwefan: https://www.rethink.org
Ffôn: 0808 801 0525/
Y Samariaid:
Gwefan: https://www.samaritans.org/
Ffôn: 116 123
Sane:
Gwefan: https://www.sane.org.uk
Ffôn: 07984 967 708
I weld ffynonellau eraill a awgrymir ar gyfer cael cymorth a chyngor, ewch i wefan y GIG
[1]Mae cylch gwaith Education Support yn cynnwys gweithio gydag ymarferwyr addysg